مہنگائی کی وجہ سے خریداری کرتے بروقت رقم نہ ہونے کی وجہ سے لوگ کریڈٹ کارڈز کے ذریعے رقم ادا کرتے ہیں، اس لئے کریڈٹ کارڈز کے ذریعے خریداری کے رجحان میں جولائی کے دوران سالانہ بنیاد پر 27.5 فیصد اضافہ ہوا، جولائی میں صارفین نے کریڈٹ کارڈز کے ذریعے 125 ارب روپے کی خریداری کی۔
اسٹیٹ بینک کے اعدادوشمار کے مطابق جولائی 2024 میں صارفین نے کریڈٹ کارڈ کے ذریعے 125 ارب روپے کی خریداری کی جو گزشتہ سال جولائی کے مقابلے میں 27.5 فیصد زیادہ ہے، گزشتہ سال جولائی میں صارفین نے کریڈٹ کارڈ کے ذریعے 98 ارب روپے کی خریداری کی تھی۔
رپورٹ کے مطابق جون کے مقابلے میں جولائی میں کریڈٹ کارڈ کے ذریعے خریداری میں ماہانہ بنیاد پر 2 فیصد اضافہ ریکارڈکیاگیا ۔ جون میں کریڈٹ کارڈز کے ذریعے صارفین نے 122 ارب روپے کی خریداری کی جو جولائی میں بڑھ کر 125 ارب روپے ہو گئی۔
واضح رہے کہ جاری مالی سال کے پہلے مہینے میں بینکوں کی جانب سے نجی شعبے کو فراہم کردہ مجموعی قرضوں کا حجم 8291 ارب روپے ریکارڈکیا گیا ہے جو گزشتہ سال جولائی کے 7998 ارب روپے کے مقابلے میں 3.7 فیصد زیادہ ہے۔
