ایسے لگتا ہے حکومت اور اسٹیبلشمنٹ گھبراہٹ کا شکار ہیں، اس لیے عمران خان اور بشری بی بی کے خلاف 190 ملین پاؤنڈ ریفرنس کا فیصلہ ایک مرتبہ پھر مؤخر کردیا گیا۔ فیصلہ 17 جنوری کو سنایا جائے گا۔
ذرائع کے مطابق عمران خان اور بشریٰ کیخلاف 190 ملین پاونڈ ریفرنس کا فیصلہ ایک مرتبہ پھر موخر کردیا گیا ۔ اسلام آباد کی احتساب عدالت نے اٹھارہ دسمبر دوہزار چوبیس کو فیصلہ محفوظ کیا تھا ۔ فیصلہ سنانے کی تاریخ تیسری دفعہ تبدیل کردی گئی۔
جج ناصر جاوید رانا نے اڈیالہ جیل راولپنڈی میں 190 ملین پاؤنڈ کیس کا ٹرائل مکمل کرکے 18 دسمبر2024 کو فیصلہ محفوظ کیا تھا۔ فیصلہ سنانےکیلئے 23 دسمبر کی تاریخ مقرر کی گئی لیکن 22 دسمبر کو عدالت نے تاریخ 6 جنوری 2025 تک بڑھا دی۔ 6 جنوری کو بھی احتساب عدالت اسلام آباد کے جج ناصرجاوید رانا کی رخصت کے باعث فیصلہ نہ آیا۔
احتساب عدالت میں تقریباً سال بھر جاری رہنے والے ٹرائل کے دوران 3 ججز تبدیل ہوئے۔ نیب نے 35 گواہان کے بیانات ریکارڈ کروائے ۔ ملزمان پر فردجرم 27 فروری 2024 کو عائد کی گئی۔ وکلائے صفائی نے سابق وفاقی وزیر زبیدہ جلال، سابق پرنسپل سیکرٹری اعظم خان، سابق وزیراعلیٰ خیبرپختونخوا پرویزخٹک سمیت تمام گواہان پر جرح کی ۔
تفتیشی افسر پر جرح 38 سماعتوں کے بعد مکمل ہوئی جبکہ ملزمان کو 342 کے بیانات مکمل کرنے کیلئے 15 مواقع ملے۔ ملزمان نے اپنے دفاع میں کوئی گواہ پیش نہیں کیا۔۔ عدالت نے 16 گواہوں کو بطور عدالتی گواہ طلب کرنے سے متعلق ملزمان کی درخواست مسترد کر دی تھی۔
